కృతజ్ఞత

.........."వర్షం వెళ్ళిపోయింది.....మబ్బుల రథాలెక్కి!

జలదానం చేసిన మేఘాలకి జోహార్లు చెప్పాయి చరాచరాలు!

భూమిలో ఉన్న చిన్నారి గింజ మెడ బయటపెట్టి

మొదటవచ్చిన రెండాకుల్ని చేతులుగా జోడించింది....కృతజ్ఞతతో.........."

----------శేషేంద్ర (గుంటూరు శేషేంద్ర శర్మ)

..........నేనుతప్ప!

నిరంతరం నాకోసం ఎవ్వరూ ఏడవరు..........

..........నాకళ్ళుతప్ప!

నిరంతరం నాకోసం నాతో ఎవ్వరూ నడవరు..........

..........నా అడుగులు తప్ప!

నిరంతరం నాకోసం నాతో ఎవ్వరూ మాట్లాడరు..........

..........నిశ్శబ్దం తప్ప!

నిరంతరం నాకోసం నాకు తోడుగా ఎవ్వరూ నిలవరు..........

..........నా ఒంటరితనం తప్ప!

నిరంతరం నన్ను నన్నుగా ఎవ్వరూ గుర్తించరు..........

..........నా అంతరాత్మ తప్ప!

నిరంతరం నాకోసం నన్ను నన్నుగా ఎవ్వరూ ప్రేమించరు..........
..........నా మనస్సు తప్ప!

..........అందుకే ఇంట్రావర్ట్ నయిన నా లోకంలో

నాకంటూ ఎవ్వరూ ఉండరు--నేను తప్ప!

----------శ్రీ

నా హృదయం

నా హృదయం ఒక సులలిత సుమం..........
..........ముట్టుకుంటే ముకుళించుకు పోతుంది!

నా హృదయం ఒక మంచు పర్వతం..........
..........కనుచూపుకే కరిగిపోతుంది!

నా హృదయం ఒక కారుణ్య మేఘం..........
..........కోరితే ప్రేమ జల్లులు కురిపిస్తుంది!

నా హృదయం ఒక ప్రేమ సముద్రం..........
..........ఆత్మీయతకోసం ఆరాటపడే ఆర్తిని తీరుస్తుంది!

నా హృదయం ఒక అమృత కలశం..........
..........అణువణువునా ఆనందసుధని అందిస్తుంది!

నా హృదయం ఒక అందమైన అద్దం!.....
..........కించిత్ బాధ కలిగినా, తునాతునకలైపొతుంది......!!!!!

.....................శ్రీ

"ఇంట్రావర్ట్ నైన నేను..............

చెప్పాలనుకుంటే 'కలాన్నీ'........

వినాలనుకుంటే 'పుస్తకాన్నీ'
ఆశ్రయిస్తాను..........."

------------శ్రీ

నా కవితలు

'ఎక్కడో దిగంతాల చివరన భూమ్యాకాశాలు కలిసే చొట, ఆనందాన్నీ, విషాదాన్నీ విడదీసే సన్నని రేఖమీద నిలబడి పాడుకుంటూ ఉంటాను....యెవ్వరూ వినని పాటని!

సుఖాంతమూ, దుహ్ఖాంతమూ కాని ఒక వేదాంతాన్ని మననం చేసుకుంటూ సాగిపోతూ వుంటాను............ఎవ్వరూ నడవని బాటని!

ఎప్పుడో నవ్వే పువ్వులనీ, ఎగిరే గువ్వలనీ చూసి, నామది రెండు కన్నీటి చుక్కలు రాలిస్తే..............అవి అక్షర ముత్యాలుగా నా కలం నుంచి జాలువారుతాయి!

అనుభూతుల తెమ్మెరల తాకిడికి, నా హృదయం లోంచి భావాల పుష్పాలు రాలి, అక్షరాలలో అందంగా ఒదిగిపోతాయి!

అక్షరాల ముత్యాలనీ, భావాల పుష్పాలనీఅందంగా అల్లితే.......కవితల ముత్యాల సరాలు ఆవిర్భవిస్తాయి!'

--------------శ్రీ

చదువరులకి------

"శ్రీ" అనే కలంపేరు పెట్టుకొన్న, ఒక పాప, తనకి ఇరవై యేళ్ళు వచ్చే లోపల తన లేలేత భావనల్ని 'కవితాత్మకంగా' ఆవిష్కరించిన "ఒక మౌనం పలికింది" అనే అముద్రిత ఖండకావ్య గుఛ్ఛం నుంచి.........కొన్ని!......అప్పుడప్పుడూ......!
ఇవి కాక ప్రసిద్ధ కవుల, రచయితల కవితలూ, రచనలూ కూడా.........! (సాధారణంగా యెవరూ చదివి/విని వుండనివి!)

మరి ఆనందించండి!

మీ స్పందన తెలియ చేస్తే..........సంతొషం!

మరి ఆలస్యం యెందుకు?

'మనసు మూగదైపొతే మౌనమే మాట్లాడుతుంది.
అనుభూతుల తాకిడికి మూగవోయిన నా మనస్సులోంచి----
"ఒక మౌనం పలికింది!"
-------శ్రీ

నా కవితలు

నా కవితలు కూసే కోయిల కువకువలలో
వినిపించే ఆర్ ద్రగీతాలు...

నా కవితలు పిల్లగాలుల పిల్లనగ్రొవిలు మోసుకొచ్చే
ప్రేమసందేశాలు...

నా కవితలు చిన్నారి పాపాయిల బోసినవ్వులు
కురిపించే అమృతంపు వానలు.....!

------శ్రీ